Manipur-a senior Congress MLA-in BJP zawm

Manipur-a Congress party senior leader, MLA Dr Chaltonlien Amo chuan Pathianni khan BJP a zawm.

Election Commission of India (ECI) in Manipur assembly inthlan neih hun tur a puan tukah, Dr Chaltonlien hian Congress party hi a chhuahsan zui ve nghal a ni.

Dr Chaltonlien Amo hi Tipaimukh bialtu MLA niin, Manipur Pradesh Congress Committee (MPCC)-a vice president ni lai a ni.

Pathianni khan Imphal-a BJP office-ah Dr Chaltonlien hi an party member atan lakluh a ni a, he hun hi Manipur party-incharge, union minister of labour and employment Bhupedra Yadav bakah chief minister N Biren Singh leh BJP Manipur president A Sharda Devi-ten an telpui.

Kar liam ta khan Congress senior MLA dang, D Korungthang chuan an party chhuahsanin Naga People's Front (NPF) a lo zawm tawh bawk.

Seat 60 awmna, Manipur assembly inthlan hi thawh hniha neih a ni dawn a, February 27 leh March 3-ah inthlan hi neih a ni ang. Inthlan thawh khatnaah hian constituency 38-ah vote thlak a ni ang a, a thawh hnihnaah constituency 22-ah vote thlak a ni ang. Vote tlate hi March 10-ah chhiarin result puan nghal a ni ang.

January 5-a electoral roll tihchhuahah Manipur-ah hian vote nei mipa 9,85,199, hmeichhia 10,49,639, transgender 208 leh rualbanlo 14,565 an awm. Polling station hi 2,959 a awm bawk a ni.

Manipur Legislative Assembly term hi March 19, 2022-ah a tawp dawn a ni. Assembly inthlan hnuhnung ber chu kum 2017,March thla khan neih a ni a, chief minister N Biren Singh kaihhruaiin Bharatiya Janata Party, National People's Party, Naga People's Front leh Lon Janshakti Party-ten ṭangrual sorkar an siam a ni.