Guwahati-ah khum 900 awmna Covid-19 hospital hawng

Assam health minister Himanta Biswa Sarma chuan Nilaini khan Guwahati khawpuia Khanapar field-ah khum 900 awmna Covid-19  hospital siam thar chu a hawng.

 

Assam-ah hian hri kai thar hi nitin an la pun belh reng a, Guwahati khawpuiah pawh an pung chak hle. Hmun danga zin chhuahna nei lo zingah hri kai hmuh chhuah eng emaw zat an awm a, hei vang hian mipuite hri leng darh tur venna atan July 14 thleng  Guwahati bikah hian total lockdown puan a ni. 

Hri kai an pun zel avangin a enkawlna hmun pawh mamawh belh a ni a, hei vang hian Khanapar field-ah hian Covid-19 hospital  lailawk tur hi siam a ni ta a ni. He hospital siam thar nen hian Guwahati-ah hri kai 1,538 enkawl theihna tur hmun an nei ta a ni. Hemi rual hian minister chuan khum 3,000 vel an mamawh tih sawiin, sorkar chuan khum 1,500 awm theihna tur dang siam turin ruahmanna pawh a siam leh mek a ni, a ti. 

Sarma hian Nilaini vek khan Guwa­hati-a Mahendra Mohan Choudhury Hospital-a Covid-19 testing lab a hawng a, hei hi testing laboratory 13 an neihna niin, a dang paruk pawh peihfel thuai a ni dawn tih a sawi. Assam-ah hian Nilaini khan hri kai hmuh chhuah thar mi 408 an awm a, heng zinga 378 chu Guwahati khawpuia mi an ni. Hri kai hmuh chhuah tawh hi mi 8,407 an tling tawh a, an zinga 5,647 chu enkawl dam an ni tawh. 

Health minister chuan Covid-19 kai, an dinhmun ngaihtuahawm lo leh natna langchhuak lo te Covid Care Centre emaw, hospital-ah emaw dah kher an nih chungchanga zawhna awm pawh chhangin,  health department lamin staff an ngah tawk lo tih a sawi. 

Minister chuan  hri kaite nena toilet pakhat inhmanṭawm chuan hri darh theihna a sang hle tih a sawi. Mahnia toilet hran hman tur nei pawh, ina inkhunghran phalsak an nih chuan an dinhmun enfiah sak reng an ngai dawn a, hemi atana tirh chhuah turin staff an indaih lo a ni, a ti. 

Hri kai an pun chak avangin Indian Council of Medical Research (ICMR) thurawn angin, state health department chuan hri kai leh kai lo enfiahna atan rapid antigen testing kit, Standard Q COVID-19 Ag kit a hmang dawn. Test neihna atan hian specialised machine a ngai kher lo a, minute 30 chhungin result a hriat theih dawna ni. Antigen test kit hi laboratory pawn lamah pawh hman theih a ni awn a, South Korea biotechnology firm SD Biosensor siam niin, kit pakhat hi Rs 450 man zel a ni.