Manipur University buaina: Zirlai ten I-Day boycott dawn

Manipur-a Joint Students Coordination Committee (JSCC) chuan state chhunga zirlai pawl zawng zawng te chuan In­depen­dence Day vawi 71-na hma ngeia Ma­nipur University buaina chinfel a nih loh chuan I-Day programme thlengin an tibuai dawn tih an sawi.

JSCC chuan an duhna tihpuitlin a nih loh chuan state sorkar thil huaihawt reng rengah an tel dawn lo tih an sawi bawk.

JSCC convenor, Nga­ri­yanbam Milan chuan state sorkar bakah central sorkar chu hma la duh lo nia puhin a dem thu a sawi. Zirlaite hmalam hun an ngaihtuah lo tih a sawi bawk a ni.

Manipur University Students’ Union (MUSU), Manipur Uni­versity Teachers’ Asso­ciation (MUTA) leh Manipur University Staffs’ Association (MUSA)-te chuan ni 73 aia tam University vice-chancellor Prof Adya Prasad Pandey chhuahtir tura phutin nawrh an huaihawt tawh a, tun thleng hian sorkar lam aṭangin thu lawmawm lam an la hre lo a ni.

Hetih lai hian MUSU president M Dayaman chuan state sorkar aṭangin thu lawmawm lam deuh hriat an nie tih sawiin, fact-finding committee-a UGC memner pahnih chu an paih leh thu a sawi a, heng mite hi Prof AP Pandey laina hnaite an ni tih a sawi.

Manipur University community aiaawh te chuan kar hmasa Zir­tawpni khan Manipur University buaina chung changah hian CM N Biren Singh-an hmu a ni.

Dayaman chuan Ministry of Human Resource Development hnen aṭanga ziak ngeia an duhna tihhlawhtlinsak an nih dawn thu intiamna a awm loh chuan an nawrh chu an chhunzawm zel dawn tih a sawi thung.

MUSU hian May 30 aṭang khan nawrh huai­hawtin University VC chu chhuahtir a nih theih nan nasa takin hma an la tawh a, hetih lai hian Pandey hian a ban dawn loh thu a lo sawi ve thung a ni. MU buaina vang hian college tam tak, MU hnuaia in affilate-te chuan buai­na an tawk mek a ni.