Tripura-ah hri kai hmuh thar mi pariat awm
Tripura-ah hian Nilaini khan sample 1,675 enfiah zingah hri kai hmuh chhuah thar mi pariat an awm a, hri kai hmuh tawh hi mi 1.402 an awm tawh a ni.
Law minister Ratan Lal Nath chuan Covid Care Centre hrang hrangah hri kai enkawl mek hi 293 an awm a, hri kai dam tawh mi 1,093 chu chhuah tir an ni tawh tih a sawi. Hmun dang aṭanga haw, ni 14 chhung inkhung hrang tura tih zinga mi 341 chu sorkar hmun siamah awmin, in-a inkhung hrang mek mi 4,881 an la awm thu a sawi bawk. Nilaini khan thlawhtheihna hmanga haw mi 474 bakah, Churabaira aṭangin mi 580 leh Damcherra
aṭangin mi 27 an haw bawk a ni.
Intern doctor-ten stipend pek phût
Tripur-a Agartala Government Medical College (AGMC)-a intern doctor 90 dawn chu an stipend pek phûtin Nilaini khan an nuar a, mahse tlai lamah nawrh hi an tihtawp leh nghal. Intern doctor-te hi stipend, thla khatah Rs 18,000 pek an ni ṭhin a, mahse sorkar chuan thla hnih chhung stipend hi a batsak tawh a ni. Mahse medical superintendent Dr Debasish Roy leh medical official dangten an thil phut hi kar khat chhunga chinfel sak an tiam avangin an nuar chhunzawm ta lo a ni.