Assam : MoS Rajen Gohain bang tura nawr tu an tam

Railway Minister for State Rajen Gohain-a lakah pawngsual thubuai ziahluh a nih thu tarlan a nih hnu lawkah, Assam-ah pawh Gohain-a bang tura nawrna a nasa nghal hle.

Hetih mek lai hian nu pahnih dang pawhin hna an hmuh theih nan Gohain hian mipat hmeichhiatna lam hawiin an lakah a che tih an sawi ve bawk.

Thawhṭanni khan eptu party pahnih - Congress leh AIUDF-te chuan pawngsuala puh Union Minister of State of Railways Rajen Gohain chu bang thuai tura an duh thu an sawi a ni.

Assam Pradesh Congress Committee (APCC) general secretary Apurba Bhattacharya chuan Gohain bantir chu thil pawimawh tak a nih thu a sawi a, pawngsual case chhuina pawh dik tak leh zalen taka kalpui nise a duh thu a sawi a ni.

Apurba Bhattacharya chuan BJP chuan rilru dik tak an put thu a sawichhuak fo a, dikna tak tak an duh a nih chuan Prime Minister Narendra Modi chuan minister thil tisualtu chu a nihna aṭangin a ban tur a ni, a ti. A lakah case ziahluh a ni tawh a, thubuai tehluttutr lamin inhnuhdawh leh duh mah se chhuina chu a tawp thlenga kalpui tur a ni, a ti bawk.

Bhattacharya chuan police-te chu dik taka chhuizuina kalpui tura chahin politics inhnamhnawih theihna reng reng laka inthiarfihlim turin a chah bawk a ni.

All India United Democratic Front(AIUDF) pawhin thu­chhuah saimin Gohian chu a nihna aṭanga bang ngam tura an duh thu an sawi ve bawk. Party thupuangtu Champak Kalita chuan, "Engin nge case ziahluh tawh hnuhdawh leh duhna kha siam? thil mak tak a ni, Rajen Gohain chuan an duh chuan a dik lo ziah amah ngeiin rawn sawi rawh se," tiin a sawi. Kalita chuan Nagaon Police chuan suo moto case Gohain lakah file se a duh thu a sawi bawk a ni.

Hetih lai hian BJP hruaitute chuan dan chu thil pawimawh ber a nih thu an sawi a, thil awmdan chu chiang takin a la lang mai dawn niin an sawi. Engmah finfiahna a awm loh thu leh mi tupawhin an duh duhin midang an puh thei tih an sawi bawk.