Meghalaya sorkar-in Khasi Lineage Bill enfiah mek

Meghalaya sorkar chuan KHADC-in tunhnaia a pawm thar KHAD (Khasi Social Custom of Lineage) (Second Amendment) Bill chu a enfiah mek nia tarlan a ni.

Meghalaya sorkar official chuan Thawhṭanni khan bill chu uluk taka an enfiah mek thu a sawi a, Law department ngaihdan pawh an la dawn tih a sawi.

Governor Ganga Prasad hnena Bill pawm­pui tura thawn a nih hnuah Governor hian Khasi Hills Autonomous District (Khasi Social Custom of Lineage) (Second Amendment) Bill, 2018 hi ennawn leh turin District Council Affairs Department hnenah a thawn let leh a ni.

Bill hi sorkarin council hnenah a thawn let leh dawn em tih zawhna chu sorkar official chuan engmah a la chian loh thua chhangin, engmah sawitheih a la neih loh thu a sawi.

KHADC CEM, Hisprea­ching Son Shylla chuan a hma in bill hi sorkarin council hnenah a thawn let leh theihna chance a sang hle tih a lo sawi tawh a ni.

Hetihlai hian KHADC Executive Committee (EC) chu nimin khan neih a ni a, Khasi Hills Autonomous Dis­trict (Khasi Social Custom of Lineage) (First and Second Amendment) Bill chungchang tho hi meeting-ah hian an sawi ho a, bill hi hnuhkir leh kir loh tur chungchang te pawh an sawi a, he thu ziah lai hian thuchiang hriat hman a ni lo.

Shylla chuan meeting zawhah hian bill chungchanga an dinhmuh tur diktak a chiang chho dawn tih a sawi a, 2015-a first amendment Bill an tihchhuahah pawh khan tihdik loh an neih thu a sawi a ni.