India-in Bangladesh leh Myanmar nena inrina veng uluk

Vawiina Independece Day vawi 72-na hmanna tura dan leh thupek khauh taka kenkawh a nih theih nan leh buaina chhuak a awm lohna turin Bangladesh leh Myanmar ramri chu uluk taka venhimna kalpui a nih thu official te chuan an sawi.

Bangladesh border chu Border Security Force-te'n uluk taka an ven laiin, Myanmar border erawh Assam Rifles-te'n an veng thung.

Tripura Inspector General of Police (law and order) K.V. Sreejesh chuan India-Bangaldesh border chu uluk lehzual zawka veng turin BSF-te chu an ngen thu a sawi a, a ruka India rama lut an awm lohna tura fimkhur tura an chah thu a sawi bawk.

Sreejesh chuan Tripura luh theihna hmun hrang hrangah chuan uluk leh zuala venhimna kalpui a nih thu leh, CCTV pawh dah a nih thu a sawi a, lirthei leh mihring lut leh chhuak reng reng chu uluk taka enfiah an nih thu a sawi.

Airport, railway station, bus termi­nal, shopping mall, bazar leh mipui tamna hmunah te uluk taka venhim­na kalpui a nih thu leh hmun pawimawh lai te chu uluk takin security force-te'n an vil reng tih a sawi bawk.

Zan lamah pawh patroll an awm reng thu leh bomb squad leh ui fing nen uluk taka venhimna kalpui a ni.

BSF mai bakah hian Tripura police, Tripura State Rifles leh Central Reserve Police Force (CRPF)-te chuan state chung chu uluk takin an vil bawk a ni.

Tripura, Meghalaya, Mizoram leh Assam-ah hian km 1,880-a thuaiah India leh Bangaldesh hi an inri a, Mizoram, Manipur, Nagaland leh Arunachal Pradesh-ah India leh Myanmar hi km 1,640-a thuiin an inri bawk a ni.