AFSPA hlih phutin Naga mipuiten kawng an zawh ; SIT-in state sorkar hnenah preliminary report thehlut

Nagaland-a sipai hnena thuneihna sang pekna, Armed Forces (Special Powers) Act (AFSPA) hlih phutin Naga mipuite chuan Dimapur aṭanga an state khawpui Kohima thleng, km 70-a thui kawng an zawh.

Kawng zawh hi ni hnih chhung neiin, Thawhṭanni khan Dimapur aṭangin an zawh ṭan a, nimin khan Kohima an thleng a ni.

Kawngzawhte hian December 4 leh 5-a security force-ten an kahhlum, pawisawi lo civil mi 14-te tana rorelna dik an phutna bakah, AFSPA an duh lohna thuziakte an keng a ni.

Ni hnih awh kawngawh hi Naga civil society organisation hrang hrangten an kaihruai a, kawngzawh ṭan hma pawhin social media lamah campaign nasa takin an nei bawk.

Dimapur leh Kohima inkara khaw hrang hrang an kaltlangte aṭangin mi tam takin kawngzawhte hi an lo zawm ve bawk a ni. Kawng chanve, Phiphema-ah Thawhṭanni zan khan chawlin nimin zing khan Kohima an pan leh nghal a ni.

Kohima-ah hian an hotute chuan state acting governor Jagdish Mukhi kaltlangin sorkar laipui hnenah memorandum an thehlut nghal bawk.

Eastern Naga Students Federation president Chingmak Chang chuan he kawngzawh hi sorkar laipui leh state sorkar hnenah a rang thei ang bera AFSPA hlih an duh thu hriattir nawn lehna atana buatsaih a nih thu a sawi. Kawngzawh hi boruak muanawm tak hnuaiah neih a ni a, an thil phut nawrna chhunzawm zelna turin kawng hrang hrangin hma an la zel dawn tih a sawi.

Nagaland-a security force-te pawikhawihna lian tak a thlen hnuah, state mipuiten AFSPA hlip tura nasa taka an nawr mek laiin, sorkar laipui chuan December 30,2021 khan thla ruk dang atan he dan sawisel hlawh tak hi a pawhsei sak leh a ni. Sorkar laipui thiltih dan chu ngaihthiam a har hle tih Chang chuan a sawi bawk.

SIT in report thehlut
Mon district-a security force-ten civil mi 14 an kahhlum chungchang chhui chiang tura Nagaland sorkarin a din, special investigation team (SIT) chuan state sorkar hnenah preliminary report a thehlut tih Thawhṭanni khan an sawi. SIT hi thla khat chhunga report thehlut tura hriattir an ni a, January 8 khan report hmasa hi an thehlut phawt tih SIT member pakhat chuan a sawi a, final report pawh peih thuai a nih tur thu a tarlang bawk.

Oting khuaa inkahna thleng chungchang an chhuinaah SIT hian thuhretu, tualchhung mite leh security mi leh sa, mi 50 vel thu an zawtfiah a ni.