Hmarchhak leh Delhi kan pawt hnai: PM

Prime Minister Narendra Modi chuan Nilaini-a Indepen­dence Day lawmnaa thu a sawi­naah hmarchhak mipuite leh Delhi chu an pawthnai tih a sawi a, hmar­chhak chuan hmasawnna kawng hrang hrangin a hmu a ni, a ti.

Independence Day vawi 72-na hmanna hun Red Fort-a neiha thu a sawiah Narendra Modi chuan kum li kalta kha chuan hmarchhak mipuite chuan Delhi chu hmun hla taka awmah an ngaih ṭhin thu a sawi a, kum li kalta chhung khan hmarchhak chu Delhi bulah kan hnukhnai a ni, tiin a sawi.

Modi chuan remna leh muanna boruak chuan hmarchhak mipuiteah mahni inrintawkna a thlen tih a sawi bawk.

Prime Minister chuan tunah chuan chanchinbu-a hmarchhak chanchin chhiar reng rengin thingtlang khuaa electric luhtir a nih thu te, kawngpui leh rel kawng siam a nih thu te tam tak chhiar tur a awm tih a sawi, hna pawh siam belh zel a nih thu leh zirna in te pawh sak belh zel a nih thu a sawi bawk a ni.

PM chuan hmarchhaka infrastructure, inkalpawhna leh electric lama hmasawnna te pawh a sawilang bawk.

Electric chuan thingtlang khua zawng zawng a thlen tawh thu leh BPO-te pawh dah an nih ṭan thu a sawi a, hmarchhak chu orga­nic farming hmunpui leh sports univer­sity dinna hmun tur a nih thu a sawi.

Prime Minister Narendra Modi chuan army, paramilitary forces, police leh intelligence agency-te chuan hmarchhaka remna leh muanna a awm theihna turin venhimna uluk tak leh nasa taka an kalpui thu a sawi a ni.

Armed Forces Special Powers Act (AFSPA) chungchang pawh sawi langin, Tripura leh Meghalaya bakah Arunachal Pradesh district ṭhenkhat aṭangin sut a nih tawh thu a sawi bawk a ni.