Assam-a insawisak hlum case huntiam chhungin chargesheet file hman dawn
Assam-a Karbi Anglong district-a June 8-a thuthang dik lo avanga mipui thinrimin Guwahati tlangval pahnih an sawisak hlum thubuai kal zelah Assam additional director-general of police (law and order) Mukesh Agrawal chuan mandatory period chhungin chargesheet an file ngei dawn thu a sawi.
Chhuizuina kalpuina enfiahtu Agarwal chuan an thil chhui chu tluang taka neih a nih thu sawiin, thil tlemte chauh chhuifiah a ngai tawh tih a sawi bawk. Ni tlem te an la neih thu sawiin, ni 90 chhung hun pek an ni tih a sawi. Agarwal chuan an hun la neih chu ṭangkai taka an hman dawn thu leh huntiam chhung ngeia chargesheet an file hman dawn thu a sawi a ni.
June 8 khan Guwahati tlangval pahnih, Nilotpal Das leh Abhijit Nath-te chu Karbi Anglong district-a sightseeing-a an kal chu mipuiin naupang rukbo tum emaw tiin nasa takin an lo sawisa a, an nunna hial an chan phah a ni.
He tualthihna thlen aṭang hian ni 60 lai a liam tawh a, Jhankar Saikia tualthah case ang maia thla 18 zet hnua chargesheet file leh pawikhawihtu bail an nih ang chiah kha a thlen leh hlau an tam hle niin an sawi.