Kan hna thlan avanga hrem nih hi kan beisei ngai lo: Meghalaya SSA zirtirtute

Meghalaya-a Sarva Shiksha Abhiyan schools zirtirtute 12481 vel chuan thla li ngawt hlawh an la thei tawh lo a, Financial year 2016-17 chhunga an thla riat Arrear pawh an la la lo a ni.

Meghalaya SSA School Association (MSSASA) Central Body President, Aristotle C Rymbai chuan mi zawng zawngin hausak tumin zirtirtu an ni ngai lo tih an hria, mahse an hna avanga an tawrhna leh hrem an nihna chu zirtirtute beisei a ni lo a ni, a ti.

Rymbai pawh hi zirtirtu hlawh la thei lo zingah hian a tel a, thla li ngawt hlawh an lak theih loh leh Arrears an lak theih loh chuan Meghalaya-a zirna quality a tichhe dawn tih sawiin, zirtirtute rilru ber a nat tlat chuan naupang an zirtir ṭhat theih dawn loh thu a sawi.

Aristotle C Rymbai chuan nitinin zirtirtu 12481-te chuan an tawrh thu sawiin sokar chuan an tana hma a lak a ngai a ni, a ti. Tun ang hunah chuan chhang leh chaw tel lo chuan dam khawchhuah ngaihna a awm loh thu sawiin zirtirtute chuan ei tur mai bakah bus leh taxi fare-te pawh an hna­thawhna hmun thlenna atan an mamawh tih a sawi bawk. SSA zirtirtu hmun kilkhawr zawka awm te chuan an mamawhna hi a zual bik hle niin a sawi bawk.

Rymbai chuan zirtirtute chuan thla li ngawt hlawh la thei tawh lo mah se tun thlengin an buaina leh harsatna chinfelna a la awm lo tih a sawi a, an tan thil a harsat hle thu a sawi.

Kum 15 chuang ele­mentary education hma­sawnna tura an thawh tawh thu sawiin naupangte chu grassroot level aṭanga an enkawl thu a sawi a, hemi anih avang hian sor­kar chuan an harsatna sut­kian sak dan kawng a ngaih­tuahsak chu a hun tawh hle niin a sawi bawk.