Assam-ah Tri-colour flag km 3.5-a thui nen kawng zawh

Assam-a Baksa district, Bhutan nena an inrina hmuna awmah chuan Nilaini khan mi sang tam takin kawng zawh. Mipuite hian km 12 zeta thuiah Tri-colour flag km 3.5-a thui kengin kawng an zawh.

Mipui pungkhawm te hian Uparkhati aṭanga Swagpur thleng kawng zawhin Uparkhati-ah hian an zawh let leh a ni. Kawngzawhnaa tel tam zawk hi ṭhalai an ni a, rambuai avanga an naupan laia Independence Day lawmnaa tel ve thei lo an ni tlangpui nia tarlan a ni.

He hunah hian mi singkhat velin kawng an zawh a, Sunrise Youth Club president Bapan Das chuan an naupan lai chuan venhimna khauh tak hnuaiah security force-te chuan I-Day hian buaina siam an awm lohna turin flag dum zar ṭhin tih a sawi. Bhutan ramhnuaiah te hel te chu an tawm ṭhin thu sawiin an naupan lai chuan I-Day chu hlauhna nen hun an hman ṭhin thu a sawi.

Sunrise Youth Club kaihhruina hnuaiah hian km. 3.5 a sei flag hi siam a ni a, Das chuan khawvel mipuite hnenah Uparkhati khua a awm tih hriattir an tumna kawng a nih thu sawiin mi 4000 vel an beisei laia mi singkhat an pungkhawm chu lawmawm a tih thu a sawi a ni.

Uparkhati thingtlang khua hi Assam state khawpui Guwahati hmar thlanglam km 60 vela hlaa awm a ni a, Bhutan bula awm niin tual­chhung mi tam ber hi loneimi an ni.

Das chuan flag siam nan hian mipuite sum thawhkhawm aṭangin cheng nuai 5 vel an sen thu sawiin metre 5000 vela sei puanthan an hman thu a sawi bawk.