Politician ten Vajpayee uinna thu an sawi ; Nagaland in ni sarih chhung sun dawn

Prime Minister hlui Atal Bihari Vajpayee a thih vangin hmarchhak state hrang hrang chuan nimin khan chawlh an puang a, rampumah uitu an tam hle.

Hmarchhak politician challang tak tak te pawhin an ui thu an sawilang a, Meghalaya Chief Minister Conrad Sangma chuan a twitter-ah India chuan ram hmasawnna atana a hnathawh chu a hriat reng tawh dawn thu ziakin, hmarchhak tana a hmathlir ropui tak te chu theihnghilh a nih tawh dawn loh thu a ziak.

Meghalaya congress legislator leh minister hlui ni bawk Dr Ampareen Lyngdoh chuan a Vajpayee chhungte a tawrhpui thu sawiin, a in­ngaihtlawmna leh Parliament chhung leh pawna a thawhpuite laka a ṭhatna chu hriatreng a ni tawh dawn tih a sawi.

Tripura Pradesh Congress Committee (TPCC) president leh Royal Family head Pradyot Manikya Debbarma chuan hruaitu ropui tak a nih thu sawiin ani ang politician chu ramin a mamawh thu leh amah ang an tam loh thu a sawi ve bawk.

Nagaland Chief Minister, Neiphiu Rio chuan PM hlui thihna chuan a tih lungngaih thu a sawi a, Nagaland mipuite thinlungah hmun laili tak a chan thu a sawi bawk a ni.

Arunachal Pradesh Chief Minister, Pema Khandu pawhin a twitter-ah a ui thu ziakin, mi entawn tlak tak a nihna chu hriatreng a nih tur thu a ziak.

Sikkim Chief Minister, Pawan Chamling chuan ramin a statesmen neih ṭhat ber zinga mi a chan thu leh leilung fa nih tlin tak a chan thu a sawi.

Manipur Chief Minister, N Biren Singh chuan poet, statesmen leh hruaitu ropui thihna chuan a tihrilhhai hle tih a sawi ve bawk.

Assam Chief Minister, Sarbananda Sonowal chuan PM hlui thihna chuan a tina hle tih sawiin ram hruaitu ropui ber zinga mi a nih thu a sawi ve bawk a ni.

Nagaland sorkar chuan thuchhuah siamin Prime Minister hlui Atal Bihari Vajpayee zahna lantir nan ni sarih chhung sunna hun an hman dawn thu sawiin, hei hian general public holiday pawh a huam dawn tih an sawi.

Nimin khan sorkar office zawng zawng leh zirna in zawng zawng chu khar vek a ni a, DIPR in thuchhuah a siamah chuan August 22 thleng sunna hun hi hman a ni dawn tih an tarlang.

National Flag pawh sunna hun hman chhung hi chuan a ngul chanveah zar a ni dawn a, hetih chhung hian intihhlimna hun pawh buatsaih phal a ni dawn lo a ni.