Manipur sorkarin 'disturbed area'-a puanna a pawtsei
Manipur sorkar chuan an state pum, Imphal Municipal Area huam loin 'Disturbed Area'-a puan chu kum khat dang a pawtsei. He thupek hi December 1, 2021 aṭang khan chhiar ṭan a ni.
Special secretary (home) H.Gyan Prakash chuan January 8 khan disturbed area-a puan pawtsei a, kum khat dang Armed Forces (Special Powers) Act (AFSPA) pawhseina tur hriattirna hi a tichhuak a, Thawhṭanni khan sorkar chuan a puangzar a ni.
Hriattirna a tihchhuahah Prakash chuan, Manipur Governor chuan helpawlte pawikhawihna hrang hrang thleng ṭhin avangin, Manipur state pum dinhmun chu a la ṭha lo a, hei vang hian civil thuneitute pui tura sipaite dah chhunzawm zel an la ṭul niin a ngai tih a sawi. Hei vang hian Imphal Municipal Area huam tel loin, Manipur state pum chu kum khat dang disturbed area-a puan chhunzawmin, sipai hnena thuneihna sang pekna AFSPA pawh hman chhunzawm a la ni dawn a ni, a ti.
Manipur sorkarin disturbed area-a pawtsei chungchangah Congress party chuan rorellai, BJP chu na takin a bei zui nghal. BJP sorkarin state chhunga dan leh thupek dinhmunin hma a sawn zel tih a sawi laia AFSPA a pawhsei lehna chhan an zawt nghal a ni. Manipur chuan assembly inthlanah an chak a nih chuan, cabinet meeting hmasa berah AFSPA hlih dan tur ngaihtual nghal an tiam.
BJP kaihhruai sorkara tel, Manipur-a Naga People's Front (NPF) leh National People's Party (NPP) pawhin AFSPA hlih hi an phut a ni.
December 4-a security force-ten Nagaland-a Mon district-a civil mi an kahhlum hnu khan, sawisel hlawh tak AFSPA hi Nagaland bakah, hmarchhak hmun dang aṭang pawhin hlip tura phutna a nasa hle a ni.
Kum 2004, August thla khan mipuiten lungawi lohna an lantir hnuah Manipur-a assembly constituency pasarih aṭangin AFSPA hi hlih a ni. AFSPA hlih phut hian Irom Sharmila Chanu chuan kum 16 dawn chaw a nghei a ni. Kum 2000, November thla khan Assam Rifles sipiaten Imphal airport bulah mi 10 an kahhlum hnuah AFSPA hlih phut hian chaw ngheiin nawrh a huaihawt a, kum 2016-ah a titawp chauh a ni.