Manipur : Pathiannia inthlan neih tur sawn turin ngen

All Tribal Students' Union Manipur (ATSUM) leh Kuki Inpi Manipur (KIM) chuan Election Commission of India (ECI) hnenah an state-a assembly inthlan neih hun tura Pathianni ruat a ni chu sawn turin an ngen.

Manipur assembly inthlan hi thawh hniha neih a ni dawn a, February 27 leh March 3-ah vote thlak tura tih niin, February 27 hi Pathianni a ni.

ATSUM chuan tribal mipuite leh Kristiante dinhmun ngaihtuah a, hill district bikah inthlan hun hi sawn turin an ngen.

ATSUM information and publicity secretary, Khaiminlen Doungel chuan, "Manipur state mipui zinga 43% hi tribal niin, heng mite hi a tam ber chu Kristian an ni. Kristiante tan Pathianni hi an ni thianghlim, ni serh leh pawimawh tak a ni. State election commission hian state chhunga Kristiante dinhmun a ngaihtuah pui lo a ni," a ti.

State election commission chuan vote nei chinten an mawhphurhna anga vote an thlak vek theihna tur a ngaihtuah tur a ni a, mahse Pathiannia vote thlak a nih chuan hill district-ah mi tam takin vote an thlak loh phah dawn niin a sawi.

KIM pawhin state election officer hnenah complaint thehlutin, Pathiannia inthlan neih tur chu sawn turin an ngen. KIM general secretary Shokholun Mate chuan Pathiannia vote thlak tura tih chu Kristiante rilru a ti na hle tih sawiin, complaint pawh a tam tih a sawi.