Assam-ah thla 6 chhunga hri kai tam ber ni thleng

Assam state-ah Covid-19 hri kai an pun belh zel a, positivity rate pawh 5.69%-ah a kai chho tawh.

Thawhlehni khan hri kai thar 2,837 awmin thla ruk chhunga ni khata hri kai thar tam ber ni a ni.

Chief minister Himanta Biswa Sarma chuan hri kai pung zel mah se lockdown puan tumna a awm lo tih a sawi a, hemi rual hian hri lengin zual lam a pan zel a nih chuan sorkarin khuahkhirhna khauh tak a kalpui tur thu a sawi. Tunah rih chuan state chhunga hri leng chu an la thunun thei tih a sawi.

"Hri leng thar leh mekah Assam-ah hian ni khatah hri kai thar 12,000 - 14,000 thleng pawh an awm mai thei a ni. Mahse ni 45 hnuah chuan hri leng thawh thumna hi a zo tawh turah kan beisei. Tunah rih chuan hri leng hi kan la thunun thei a,mahse nakin zelah eng nge thleng dawn erawh kan hre lo. Hri kai pung mah se hospital panpui ngai erawh an la tlem a ni. Mahse boruak a danglam a, hospital panpui ngai an pun a, hospital khumte an indaih lo chho a nih erawh chuan ruahmanna dang kan la siam ang," a ti.