AAPSU-ten ‘Operation Clean Drive’ ṭan

Mi 100 chuang state chhuahsan tir
Arunachal Pradesh-a zirlai pawl lian ber All Arunachal Pradesh Students’ Union (AAPSU) chuan Zirtawpni aṭang khan ‘Operation Clean Drive’ an kalpui ṭan a, dan loa ramdang mi an state chhunga awm te leh Arunchal mi ni lo, ILP nei si loa state chhunga awm te dapna beihpui an thlak.Ṭ

Report ṭhenkhat chuan AAPSU member eng emaw zat chu an id kengin Raj Bhavan tri-junction bula kawngpuia lirthei tlan te an dap tih an tarlang a, police-ten an enpui awm hmuhtur a awm loh avangin state sorkar chuan ILP dap hna chu AAPSU kutah a dah nia a lan thu tarlan a ni bawk.

Chawhnu lamah erawh police ṭhenkhat chuan ILP dap hna hi an kalpui ve niin an sawi.

Naharlagun-ah chuan ILP nei lo te chu state chhuahsan turin thuchhuah siam a ni a, AAPSU-te chuan police-te ṭanpuina in mi 1000 chuang document mumal nei lo te chu Zirtawpni khan capital complex aṭanga nawr chhuah an nih thu an sawi a ni. Hetih lai hian police-te chuan zirlai pawl te thuchhuah siam letling chiahin thuchhuah an siam thung.

Capital SP M Harsha Vardhan chuan ILP nei lo mi 134 an man thu leh heng an mi man zawng zawng te hi state pawn lamah an thawnchhuah thu an sawi a ni.

AAPSU chuan Inrinni khan ILP nei lo dapna hi an kalpui chhunzawm zel dawn thu sawi mah se Vardhan chuan mi tupawhin anmahni thua dan lekkawh an tum a nih chuan an ngai thutak hle dawn niin a sawi thung.

AAPSU hian Assam NRC draft list July 30-a an tlangzarh hnu lawk khan ‘Operation Clean Drive’ an kalpui dawn thu hi an sawi nghal a, India mi ILP nei lo te chu ni 15 chhunga ILP nei hman ngei turin an hriattir bawk a ni.