MU buaina: University Community-ten nawrh tihtawp tum ṭhulh leh

Manipur University co­mmunity-te chuan Inrinni khan nawrh tihtawp lailawk hrih an tum chu an ṭhulh leh thu sawiin, Ningani-a HRD-te nena inremna an siam chu HRD lam hian an palzut avangin an ṭhulh leh tih an sawi.

MUSU, MUTA leh MUSA-ten thuchhuah inṭawm an siamah Union ministry of Human Resource Development chu August 16-a inremna an siam tawh palzutah an puh.

HRD Ministry leh Manipur University community te hian kar hmasa Ningani khan inremna an siam a, hemi anih avang hian MU Community lam pawh hian nawrh an huaihawt chu chawlhsan lailawk hrih an tum a ni.

Inremna an siamah hian ni 15 chhungin zalen takin chhuina an neih theihna turin nawrh chu tihtawp lailawk a nih tur thu te a tel.

Zirtawpni khan Union ministry of human resource development (HRD) chuan VC AP Pandey an puhna chhuizui tur fact finding committee dinṭhat tur thupek a tichhuak a, Meghalaya High Court Retired acting chief justice, T Nandakumar chu chairman-ah la dah tho in Tezpur University (Assam) VC MK Choudhary chu a hmaa member dang te paih an nih bakah telh a ni ve thung.

Hetih lai hian MU Community thuchhuah siam chuan HRD ministry hian chhuizui tur committee a din ṭha ringawt a, Prof AP Pandey chawlhtir chungchang chu a hlamchhiah daih niin an sawi.

MU Community lam hian fact fingding committee din ṭhat hi an inremnaah a tel loh thu an sawi a, Padey-a chawlhtir a nih chungchang HRD thuchhuaha engmah a awm lo chuan an inremna siam a bawhchhe chiang hle niin an sawi a ni.

Manipur University Students’ Union (MUSU) president, M. Dayaman chuan ni thum teh­meuh HRD Ministry aiawh te leh state sorkar aiawh te nen meeting an neih thu sawiin, an inremna siam an palzutna chuan an vai bakah Chief Minister thlenga an zah lohzia an lantirna a nih thu a sawi.

Manipur Univeristy hi May 30 aṭang khan mumal taka kalpui a ni thei tawh lo a ni.