Hmarchhak state hrang hrang ten Kerala an ṭanpui dawn

Kerala chuan tunhnaiah ruahsur nasa vangin nasa takin harsatna an tawk a, tuilian nasa avangin mi 300 chuangin nunna an chan tawh a, mi nuai tam takin an in leh lo te an chhuahsan tawh a ni.

Hemi anih avang hian hmarchhak state hrang hrang te chuan Kerala tuilian tuarte ṭanpuina tur hi an pek dawn thu an sawi.

Arunachal Pradesh:

Arunachal Pradesh Chief Minister Pema Khandu chuan Kerala tuilian tuarte ṭanpuina turin Chief Minister’s Relief Fund aṭangin cheng vaibelchhe thum an pek dawn thu a sawi. Pema Khandu chuan Arunachal Pradesh leh Kerala mipuite chuan inzawmna ṭha tak hun rei tak ata tawh an neih thu a sawi a, tuilian tuarte chu an chhungkhat te ang mai an nih thu leh tuilian tuarte chu a tawrhpui thu a twitter-ah a ziak.

Assam:

Assam sorkar pawhin Arunachal Pradesh ang tho in Kerala tuilian tuarte ṭanpuina tur hian cheng vaibelchhe thum an pek dawn thu Pathianni khan an sawi ve bawk. Chief Minister Sarbananda Sonowal chuan tuilian avanga an in leh lo chan ta te leh an nunna hial chan te chu a tawrhpui thu a sawi a, cheng vaibelchhe thum ṭanpuina an pe dawn tih a sawi a ni.

Manipur:

Chief Minister N Biren Singh kaihhruai Manipur sorkar pawhin Kerala tuilian tuar te ṭanpuina tur hian cheng vaibelchhe hnih an pe ve bawk. Chief Minister chuan Kerala mipuite tawrhna chu Manipur mipuite chuan an tawrhpui thu sawiin, India ram pum an tana an awm reng tih an hriatna chuan thlamuan mawlh rawh se, a ti. Manipur mipui te chuan an ṭawnagṭaipui reng thu a sawi bawk a ni.

Nagaland:

Nagaland sorkar aiawhin Chief Minister Neiphiu Rio chuan Kerala tan cheng vaibelchhe khat an pek dawn thu a sawi.

Neiphiu Rio chuan Nagaland mipuite chu an theih ang anga Kerala ṭanpuina tur thawhkhawm turin a ngen a, sum leh pai thawh ve lem lote pawh Kerala tana ṭawngṭai sak turin a sawm a ni. Chief Minister's relief fund kaltlangin Kerala hi an ṭanpui dawn a, CM relief fund atan hian Governor PB Acharya pawhin cheng nuai hnih a lo thawh tawh nghe nghe.

Kerala tuilian avang hian mi 357 in nunna an chan tawh niin Pathianni thleng kha chuan report a ni a, mi 310,000 chuangin an awmna hmun an chhuahsan tawh niin report a ni bawk. Prime Minister Narendra Modi pawhin Inrinni khan Kerala tuilian tuarte

ṭanpuina tur hian cheng vaibelchhe 500 pek a nih dawn thu a lo sawi tawh a, Home Minister Rajnath Singh pawhin kar hmasa khan cheng vaibelchhe 100 an pek dawn thu a lo sawi tawh bawk a ni.