AAPSU-in ILP dap hna chawlhsan lailawk

Arunachal Pradesh-a zirlai pawl lian ber All Arunachal Pradesh Students’ Union (AAPSU) chuan ni hnih chhung state chhunga Inner Line Permit (ILP) nei loa awm te dapna beihpui a thlak ‘operation clean drive’ chu an chawlhsan lailawk dawn thu an sawi.

AAPSU thuchhuah siamah chuan AAPSU hnuaia ILP Issue Committee-in state pum huap ‘operation clean drive’, dan loa state chhunga awm te dapna beihpui an thlak thawh khatna chu Pathianni khan an chawlhsan lailawk hrih dawn tih an tarlang.

Thuchhuah an siamah chuan ni hnih chhung beihpui an thlak chhung khan ILP nei lo leh document mumal nei lo mi 2,205 state chhung hmun hrang hrangah an hmuchhuah thu an tarlang bawk. State chhunga unit ṭhenkhat te chuan report an la thehluh loh avangin ILP palzut zat hi an la pun an rin thu an tarlang tel bawk.

AAPSU chuan heng docu­ment mumal nei lo te lakah hian Bengal Eastern Frontier Regulation (BEFR) of 1873 hnuaiah an lakah ṭul anga dan lekkawh a nih dawn thu leh, state pawn lamah chhuahtir an nih vat dawn thu an sawi.

‘Operation clean drive’ kalpui laia ILP nei lo mi eng emaw zat lakah engmah hmalak a nih loh thu report an dawng tih sawiin, heng ho lakah pawh hian hma an lak thuai dawn thu an sawi bawk a ni.

Zirlai pawl te hian Ningani hian consultative meeting neih an tum a, hetah hian ‘operation clean drive’thawh hnihna kalpui dan tur an sawiho leh dawn nia sawi a ni bawk.

AAPSU ILP Issue Committee aiawh te hian state sorkar pawh an hmalakna chungchang sawipui tur hian hmuh thuai an tum.

AAPSU hian 'operation clean drive' thawh khatna hi kar hmasa Zirtawpni leh Inrinni khan an kalpui a ni.