ZUF info secy leh chairman Meghalaya-ah man
Meghalaya police-te chuan Thawhṭanni khan Manipur hel pawl Zeliangrong United Front (ZUF) mi pahnih an man thu an sawi.
Police-te chuan an mi mante hi West Jaintia Hills-a Phramer area-ah an man thu sawiin Guwhatai aṭanga Silchar an pan lai an man thu an sawi bawk.
An mi man te hi ZUF mi pawimawh tak ve ve an nih thu tarlan a ni a, an lu man pawh chhiar hial an ni. Pakhat zawk hi ZUF chairman Raitu Chawang (66), Raitu tia hriat lar leh information secretary, Gengchung Pou Namthuiyang (43), Dangmei tia hriat lar te an ni.
Police-te chuan intelligence aṭanga an thudawn, ZUF mi pahnih te chuan Night Super Bus-in Guwahati aṭanga Silchar an pan thu an dawn chu bawhzuiin Phramer area-ah hian lo enfiah tur an dah nghal bawk a ni. Zing dar 2.30 velah Night Super Bus (B/R No. AS 01 JC – 1300) an dapnaah West Jaintia Hills Special Cell-te chuan ZUF hruaitu lu pahnih hi an man ta niin an tarlang.
An mi man te kut aṭang hian mobile phone pali an mansak a, WJH SP, Vivek Syiem chuan thu an zawhfiah hmasaknaah chuan Guwahati aṭanga Silchar an pan ngei thu leh ZUF mi an ni ngei tih pawh an inpuan thu a sawi.
Syiem chuan ZUF chu hel pawl, Nagaland leh Manipur-a beihpui thlak ṭhin an nih thu sawiin, an military wing pawh Zeliangrong Tiger Force (ZTF) a nih thu a sawi a ni.
An mi man te lakah hian CrPC hnuaiah thubuai ziahluh nghal a ni a, Judicial Magistrate First Class court, West Jaintia Hills-ah an chungchang ngaihtuah turin thawn an ni bawk.
Report in a tarlan dan chuan an mi man pahnih te hi Manipur-a Tamenglong district-ah Arms Act hnuaiah thubuai panga lai awrh mek an ni. Superintendent of Police, Tamenglong district chuan Meghalaya police-ten an man pahnihte buaipui tur hian team a tir nghal bawk a ni.