Manipur Congress in Minister hlui leh BJP mi pahnih lawmlut

Manipur Pradesh Cong­ress Committee (MPCC) chuan Thawhṭanni khan minister hlui Ningthou­jam Mangi, BJP mi bakah BJP member dang pahnih an party-ah an lawmlut.

BJP mi pahnih dang an lawmluhte hi Thongju Assembly constituency ami Sanglakpam Pres­hyojit Sharma leh Yaiskul Assembly constituency mi Huidrom Vikramjit-te an ni.

Mangi hi Manipur-a Congress kaihhruaiin sorkarna an chan lai khan CPI Minister a ni a, February 5, 2017 khan CPI chhuahsanin BJP a zawm a, June 8 khan BJP a chhuahsan thu a lo sawi tawh a, Thawhṭanni khan Congress hian an lawmlut leh ta thung a ni.

Heng mi pathumte lawm­luhna inkhawm hi Sad­bhavana Diwas grand reception-ah neih a ni a, Prime Minister Rajiv Gandhi piancham vawi 74-na lawmna an nei nghal bawk.

He hunah hian CLP leader leh chief minister hlui ni bawk Okram Ibobi Singh chuan hei hi a bulṭanna chauh a nih thu sawiin, 2019 inthlan dawnah phei chuan hruaitu tam takin Congress an zawm dawn tih a sawi.

Mangi chu BJP a zawm lai khan mi dik tak hmun dik loa awm a nih thu a sawi a, CPI leh Congress chu party duh inang, secularism ringtute an nih thu a sawi bawk.