Meghalaya, Tripura leh Sikkim in Governor thar an nei dawn

President Ram Nath Kovind chuan ramchhunga Governor-te chu siksawiin Governor eng emaw zat chuan an awmhmun an sawn dawn a ni.

Heng zingah hian hmarchhak state pathum Meghalaya, Tripura leh Sikkim Governor-te pawh an tel.

Meghalaya Governor Ganga Prasad chu Sikkim Governor in a awm dawn a, Tripura Governor ni lai Tathagata Roy chu Meghalaya-ah a insawn dawn thung. Hetihlai hian Haryana Governor ni lai Kaptan Singh Solanki chu Tripura Governor a ni thung dawn a ni.

Hmarchhak state pathumte bakah hian Bihar Governor Satya Pal Malik chu Jammu & Kashmir Governor a ni dawn thung a, Jammu & Kashmir Governor nilai Lal Ji Tandon chu Bihar-ah a awm thung ang.

Satyadev Narayan Arya chu Haryana-ah a awm thung ang a, Uttarakhand Governor atan Baby Rani Maurya chu ruat a ni bawk.