NE Olympic Games hmasa ber Manipur in thleng dawn

Indian Olympic Asso­ciation kaihhruaina hnuaia neih tur North East Olympic Games hmasa ber chu Manipur Olympic Association in a thleng dawn.

North East Olympic Games hi October 5-8 inkara neih tur a ni.

Manipur Olympic Associa­tion general secretary Sunil Elangbam chuan Thawhṭan­ni-a Olympic Bhavan-a thu a sawinaah North East State Olympic Association ten hun rei tak ata tawh an duhthusam chu a thleng dik dawn tih sawiin, India sport history-a a hmasa ber tur thil a thleng dawn a ni, a ti. Hmarchhaka Olympic Association pariat awm te chuan infiammite hmasawnna turin nihliap pakhat hnuaiah hma an lak ho dawn thu a sawi.

Sunil Elangbam chuan tluang taka hun hman a nih theih nan organising committee an din thuai tur thu a sawi bawk.

Manipur Olympic Asso­cia­tion senior vice-president G.A. Ibopishak Sharma chuan North Eastern Council hnenah cheng vaibelchhe 1.6 chu an budget a nih thu an hrilh tawh thu a sawi. Mahse NEC huan cheng nuai 20 chiah an sanction thu sawiin heta ṭang hian cheng nuai 15 chu an hmuh tawh thu a sawi a ni.

Infiammi mi 1900 vel an beisei thu sawiin disci­pline 10, athletics, ar­chery, boxing, taek­wondo, weightlifting, wushu, football, badminton, judo leh table tennis-te hmangin inelna hi an nei dawn tih a sawi bawk.

Sharma chuan July thla khan Olympic hi buatsaih an tum tawh thu sawiin, pawisa a awm loh avang leh Manipur Olympic Association inthlan avangin a hun hi an tihkhawtlai thu a sawi.

State sorkar hnenah pawh sum leh pai hmanga puihna an dil dawn thu sawiin cheng nuai 80 tal an mamawh dawn thu a sawi a, cheng nuai 80 tal an neih loh chuan Olympic hlawhtling taka neih a harsa dawn niin a sawi bawk a ni.