Manipur-a Congress hruaitu 2 in bulah bomb puak

Manipur-a Congress party hruaitu pahnihte inah Nilaini khan bomb tihpuah a ni.

Police-te chuan Imphal West leh Imphal East district-ah bomh hi tihpuah a ni thu an sawi. Imphal East district-a Kangla Sangomshang-a Congress leader Kh Ratankumar chenna in kawtah bomb puak hian a motor a tichhia a, thil dang tihchhiat lian tham erawh a nei lo. Bomb pakhat zawk hi Imphal West district-a Samurou-a MLA hlui Salam Joy Singh chenna in bulah tihpuah a ni bawk a, gate leh a in hma lam a tichhia a ni. Congress hruaitu pahnihte hi assembly inthlan lo awm tura Congress ticket-a Khurai leh Wangoi assembly biala ding tura rinte an ni.

Security force-te chuan bomb puahna hmun hi tlawh nghalin, pawikhawihtute man chhuah tumin beihpui an thlak nghal bawk.

Nilainia pawikhawihna thleng hi Election Commission of India-in Manipur inthlan neih hun tur a puan hnu pawikhawihna a thlen ṭum hnihna a ni. January 9 khan Imphal West district-ah mi tu tih hriat loh ten motor aṭangin mi pahnih an kaphlum a, thi zinga pakhat hi police a ni.