Assam CM-in Punjab CM man turin phut

Assam chief minister Himanta Biswa Sarma chuan Punjab-a prime minister Narendra Modi venhimna lam felhlel chungchangah Punjab chief minister Charanjit Singh Channi man turin a phut.

Assam CM hian January 5-a nawrh huaihawtten Punjab-a PM convoy an dan chu Punjab CM bakah Congress high command leh central leader-ten PM that tuma an phiarrukna niin a puh. PM convoy lo dangtute chu loneitute ni loin Khalistan thlawptute zawk an ni, tiin a sawi. PM convoy dan a nih avang hian flyover-ah PM leh a ṭhuihruaite hi minute 20 chhung an tang a ni.

Tripura chief minister Biplab Kumar Deb pawhin Congress sorkarna Punjab-a PM security felhlel chungchang chu a hma aṭanga ruahman lawk vek niin a sawi. CM Deb chuan Punjab chief secretary leh Director General of Police-te chuan PM lo dawnsawn dan tur chungchangah dan an bawhchhia a ni, a ti.

Manipur chief minister N. Biren Singh pawhin Punjab-a thil thleng chungchang chu chhui chian a phut a, Punjab police-te chuan PM kalna kawng chu an thlithlai ṭha tawk lo a, hei vang hian dan beh a nih phah tih a sawi bawk. Airport-a Pujjab cM leh senior minister, CS emaw DGP emaw ten PM an lo dawngsawng lo chu mak a tih thu a sawi bawk.