Manipur University hawng ṭan leh tawh

Manipur University chu ni 85 zet khar a nih hnuah nimin aṭang khan hawn ṭan a ni leh ta.

Manipur University Students Union president M. Dayamon chuan Union HRD Ministry an thilphut te a pawmsak vek avangin nawrh chu an titawp hrih tih a sawi.

Manipur University Teachers Association leh Manipur University Staff Union-te pawhin nimin aṭang khan an hna an chhunzawm leh tur thu an sawi ve bawk.

Manipur University zirlaite hian an Vice Chancellor A.B Pandey chu, a office night club ang maia hmangah an puh a, bulletproof motor man to tak leinan University pawisa hmangah an puh bawk. Hei bakah vawi eng emaw zat a zinchhuah thu leh office pawh chawl ngunah an puh a ni. A zinchhuah nan hian University pawisa tam tham tak a hmang niin an puh bawk.

Contract basis-a hna lak dawn reng rengin a duhsak zawngte a thun ṭhinah an puh bawk a, heng zawng zawng avang hian VC chu ban a nih ngei theih nan May 30 aṭang khan nawrh an huaihawt a, ni 85 chhung University hi an khar a ni. Mahse Pandey chuan an puhna hi a pha thung a, VC tura ruat a nih thu leh ban a tum loh thu a sawi ve tawh thung.

HRD Ministry chuan Pandey an puhna chhui chiang turin fact-finding committee an din a, committee hi Meghalaya High Court chief justice retired T. Nandakumar chuan a kaihruai a ni.

Committee member tura ruat midang pahnih te chu MU Co­mmunity te hian an pawm lo thung a ni. Pandey hi chhui a nih lai hian chawlh pek a ni a, an puhna hi a dik a nih chuan a lakah action lak a ni ang.