Meghalaya-ah sangha lakluh phal leh tawh

Meghalaya Assistant Commissioner of Food Safety, Mrs. DBS Mukhim chuan nimin aṭang khan an state chhungah sangha lakluh zawrh an phal leh tawh thu a sawi.

DBS Mukhim chuan Nilaini khan state chhunga sangha lakluh te chu uluk taka an enfiah chhunzawm zel tur thu a sawi a, state chhunga sangha zawrhchhuah ṭhin te chu mihring tana hlauhawm a nih lohna turin theihtawpin an enfiah tur thu a sawi a ni.

Mukhim chuan ni 30 hnuah sangha zawrh chu an phal leh tawh thu sawiin, sangha te chu 100% chuan a him dawn lo tih a hriat thu a sawi a, sangha chu tam tak lakluh a nih avangin an zawrchhuah tur te erawh chu uluk taka an enfiah zel tawh dawn tih a sawi.

Food Safety Assistant Commissioner chuan state pawn aṭanga sangha lakluh mai bakah tualchhung sangha te pawh an enfiah dawn tih a sawi bawk.

Khasi Jaintia Fish Wholesellers and Re­tailers Association-te chuan sorkar in state chhunga sangha lakluh a phal leh ta chu lawmawm an tih thu an sawi a, an pawl president Mitchell Wankhar chuan ni 30 chhung sangha lakluh khap a nih chhung khan sangha zuartu mi tam takin an tawrh thu a sawi.

Meghalaya Health and Family Welfare Minister AL Hek pawhin a hmain August 22 aṭangin sangha lakluh an khapna chu an titawp tawh dawn tih a lo sawi ve tawh bawk a ni.

State pawn aṭanga sangha lakluhah te hi a chhiat loh nan formalin telh nia sawi a ni a, hei hi mihring rana hlauhawm thei a nih avangin sanga-te hi an enfiah nghal a ni. Sangha ṭhenkhatah chuan formalin chu telh ngei a ni tih an hmuchhuah avangin sangha lakluh hi an khap ta a ni.