Vajpayee vap in hmarchhak hmun hrang hrang thleng

Prime Minister hlui boral ta Atal Bihari Vajpayee vap chu hmarchhak lui hrang hranga paih tura tih a nih angin, tunkar chhung khan hmarchhak rawn thlengin a vap paihna hun hi hmun hrang hrangah urhsun takin an hmang.

Assam:

Prime Minister hlui hlui Atal Bihari Vajpayee vap chuan Nilaini khan Assam-a thleng a, Ningani khan Brahmaputra leh Barak luiah paih a ni.

Assam Chief Minister Sarbananda Sonowal chuan vap dahna urn hi BJP pre­sident Ranjeet Dass hnen aṭangin Nilaini khan Lokpriya Gopinath Bordoloi Interna­tional Airport-ah a lachhawng.

Dass hian Thawhlehni khan New Delhi-ah Vajpayee vap hi a zuk la a ni.

Barrak Valley lamah hian handlooms and textile minister Ranjit Dutta ho in a vap hi paih a ni thung.

Manipur:

Atal Bihari Vajpayee vap hian Ningani khan Imphal a thleng a, Imphal luiah paih a ni.

Vajpayee vap paih hma hian Governor Najma Heptulla leh Chief Minister N. Biren Singh-te chuan PM hlui zahna lantirin City Convention Centre, Palace Compound, Imphal East-ah hun an hmang phawt a, hemi hmuah hian a vap hi paih a ni chauh a ni.

Vajpayee vap a lo thlen hian chief minister chuan City Con­vention Centre-ah hian a keng phei a, hetah hian vantlang inkhawm an buatsaih pui nghal a, state sorkar mi pawimawh hrang hrangin thu an sawi.

Meghalaya:

Vajpayee vap hian Ningani khan Meghalaya a thleng a, Lokpriya Gopinath Bordoloi International Airport, Guwahati aṭangin BJP state president, Shibun Lyngdoh chuan la in Shillong BJP Office-ah a dah rih a ni.

Vawiin hian Umshyrpi luiah a vap hi paih a ni dawn a, he hun hi urhsun taka hman tum a nih thu BJP hruaitute chuan an sawi. Nongpoh, Ri-bhoi District-ah pawh conference hall-ah BJP-te chuan PM hlui zahna lantirnan urhsun takin hun hman an tum bawk.

Nagaland:

Ningani vek khan Nagaland State BJP unit chuan Vajpayee vap hi Nagaland an thlenpui a, BJP State president Temjen Imna Along Longkumer chuan Prime Minister Narendra Modi leh Union home minister Rajnath Singh hnen aṭangin Nilaini khan a zuk la a ni.