Nagaland : Konyak hnam-in sorkar ni 10 hun pek belh

Nagaland-a Konyak hnam pawl hrang hrangte chuan security force-ten civil mi an kahhlum chungchanga an thil phut tihhlawhtling tura sorkar hun an pek chu ni 10 an pawtsei.

Konyak hnamte hian civil mite kahhlumnaa inhnamhnawih sipaite chu civil court-ah thubuai siamsak vek leh, sorkar hmalak dan pawh mipui hriata puangzar zel turin an phut a ni. Hemi tihhlawhtling tur hian sorkar chu ni 30 hun an pe a, January 10 khan an hun pek hi a zo a ni. Inrinni liam ta khan ni 10 dang hun an pek belh leh.

Sorkarin an thil phut hi a tihlawhtling lo a nih chuan, Eastern Nagaland People's Organisation (ENPO) resolution lo siam tawh angin, Konyak hnamte chu an huam chhunga national event zawng zawngah an tel tawh dawn lo tih an sawi a ni. ENPO hi Nagaland-a district panga - Mon, Tuensang, Longleng, Kiphire leh Noklak-a Naga hnam pawl lian ber a ni.

December 14-a Longleng-a ENPO resolution siamah khan, civil mi kaphlumtute lakah rorelna dik tak lekkawh a nih hma chuan Indian Armed Force te an thawhpui tawh dawn lo tih pawh an sawi tel bawk.

Konyak pawlte hian an thil phut hi India President hnenah an thehlut a ni.

Mon district-a security force ten civil mite an kahhlum chungchang chhuitu, Nagaland sorkarin a din Special Investigation Team (SIT) leh Indian Army-a court of inquiry report kimchang chu Konyak Union hriattir an phut bawk.