Assam sorkarin Covid vaccine lo te House arrest-a dahna kalpui ṭan

Assam sorkar chuan hri leng hluar thar leh mekah mipuiten vaccine an lak ṭhatna tura a hmalakna kawng khat atan, Inrinni liam ta aṭang khan vaccine la lote pawn chhuak theiloa hrekna tur, house arrest a kalpui ṭan.

State sorkarin 'no vaccine no entry' a hmannaah vaccine la lote hi 'virtual'-in house arrest an ni dawn a, vantlang hmun leh office-ah te an kal khap a ni.

Chief minister Himanta Biswa Sarma chuan vaccine dose kima la chauh hotel, restaurant, cinema hall, sorkar office leh mall-ahte kal phal a ni tih a sawi. Heng hmuna kal turte chuan vaccine an lakna certificate an entir zel a ngai ang. Vaccine la lote chu damdawi-inah chauh an kal ve phalsak an ni tih CM chuan a sawi.

Institution, Covid kaihhruaina dan zawm lo te chu Rs 25,000 zel chawitir an ni dawn a, sorkar hnathawk vaccine dose kima la lote pawh office an kal phal a ni lo. Leave lak tur an la neih chuan laktir an ni ang a, leave an neih tawh loh pawhin unpaid leave anga kaltir an ni ang.