Manipur-in kaihhruaina thar tichhuak

Manipur sorkar chuan Covid-19 hri kai an la pun belh zel avangin kar liam ta Inrinni aṭang khan kaihhruaina thar a tichhuak leh.

Chief secretary Rajesh Kumar-a'n thuchhuah thar a siamah, in chhungah mi 50 aia tam punkhawm khap a ni a, open space-ah mi 200 chin awmkhawm phal a ni. Punkhawmna hmunah face mask hman vek tur a ni a, dan zawm lote chu hrem zel an ni ang.

State executive chairman ni bawk, Kumar chuan district magistrate leh district superintendent of police-te chu Covid kaihhruaina dan lekkawh chungchangah mawhphurtu an ni tih hrilhin, dante hi khauh taka kengkawh turin a hriattir.

Chief Secretary chuan punkhawm chungchang dan an siam thar hi Election Commission of India hnen aṭanga kaihhruaina thar siam an dawn hma chuan hman a ni ang tih a sawi bawk.

Manipur-ah hian kar liam ta Zirtawpni khan Omicron variant kai paruk hmuh belh leh a ni a, state chhunga he variant kai hi pasarih an awm tawh a ni. Omicron kai hmuh thar zinga pakhat hi ram pawn aṭanga rawn haw niin, pakhat dang chu ram dang aṭanga an state tlawhtu a ni a, midang kai ve dangte hi an contact-te an ni.