US aṭanga vawksa lakluh duh lo

Sorkar laipuiin US aṭanga vawksa lakluh a tum chu hmarchhak biala vawk vulhtuten an duh lo hle a, mi tam tak eizawnna a tiderthawng thei dawn niin an sawi.

Tun hnaiah US trade secretary Katherine Tai leh secretary of agriculture Tom Vilsack-te chuan US aṭangin vawksa leh vawksa aṭanga thil siamte chu a vawi khatna atan India ramah lakluh a nih tur thu an puang a ni.

Hetih lai hian India rama vawksa ei tamna, hmarchhak biala vawk vulhtute chuan US aṭanga vawksa lakluh hian an eizawnna a khawih buai phak hlauin, vawksa lakluh hi an duh lo tih an sawi.

North East Progressive Pig Farmers' Association (NEPPFA) chuan sorkar laipui hmalak tumna hi an theih angin an dodal zel dawn tih an sawi. NEPPFA president Monoj Kumar Basumatary chuan India rama vawk vulh zinga 40% chu hmarchhaka biala mi niin, kumtin vawksa hi metric ton nuai 1.3 vel hralhchhuah a ni ṭhin tih a sawi bawk.

Sorkar laipui chuan US aṭanga vawksa lakluh aiin, ram chhunga vawk vulhtute chu vawk chi ṭha leh an chaw ṭha zawk a ngaihtuahsak zawk tur a ni, tiin Basumatary chuan a sawi.