AP: Thamna lak vangin sorkar official man

Arunachal Pradesh police-te chuan Itanagar Municipal Corporation-a hna laknaa thamna la sorkar official senior leh midang pakhat an man.

Arunachal Pradesh, Supe­rintendent of Police, Special Investigation Cell (SIC), Pranav Tayal chuan kar hmasa Zir­tawpni khan Itanagar Muni­cipal Corporation Chief Muni­cipal Executive Officer hlui Olik Tareng bakah Nitesh Kumar Mishra-te chu hna lak chungchangah pawisa tam tham tak thamna an lak avangin man an nih thu a sawi.

Tayal chuan Ningani khan Tareng chu Uttarakhand Police-te nen ṭangkawpin an man thu a sawi a, Itanagar aṭangin a tlanbo niin a sawi. Arunachal Pradesh Police-te chuan kar khat chhungin heng mi pahnihte hi Itanagar-ah hruai thlen leh an nih dawn thu an sawi bawk.

Sorkar thudawnnain a tarlan dan chuan Itanagar Municipal Corporation hnuaia hna ruak 170 vel zet hnawhkhahnaah hian thamna lak a nih thu a sawi a ni.

All Arunachal Unemployed Engineers Association-te com­plaint bawhzuiin anti-corruption wing SIC chuan thu an zawtfiah nghal bawk.

An chhuizuinaa an tarlan dan chuan an chhuina hmasaah upper division clerk post 30 hnawhkhah nan cheng nuai nga ṭheuh thamna lak a ni a, lower division clerk post 80 hnawhkhah nan cheng nuai thum ṭheuh thamna lak a nih bakah junior engineer post 60 ruak hnawhkhana turin thamna mi pakhat zelah cheng nuai 10 lak a ni bawk.

District thuneitu lamin hna lak hi ṭhulh mah se hna atana lak tawh te hian Guwahati-a vocational institute-ah training an nei reng tho niin chhuizuitu te chuan an sawi.