Assam leiminah mi pathum thi

Assam-a Zirtawpni-a ruah nasa tak sur vanga leiminah hmeichhe pahnih leh mipa nau­pang kum hnih leh a chanve mi an thi.

Jorabat-a Sankaradeb Nagar-ah nu pakhat kum 59 mi chu Zirtawpni zan dar 11-a a ina zanriah a ei lai chu leiminin a in bang a tihchim chuan a delh a, a hmunah hian a thi nghal a ni.

Nine Mile area-a Hastinapu-ah pawh leiminin an in a hnawl avangin nu pakhat kum 22 mi leh a fapa kum hnih leh a chanve mi chuan hliam na tak an tuar a, dawmdawi-in panpui an nih laiin an pahnih hian an thi ve bawk a ni.

12 mile-ah pawh leimin hian bungraw phur lirthei pali a chhilh a, vanneihthlak takin lirthei khalhtu leh handyman-te a chhunga an chuan lai a ni lo hlauh niin report chuan a tarlang.

Kamrup (metro) district thu­neitute chuan Hastinapu a nunna chan te hi chu a hma pawhin hmun him lama insawn turin an lo hrilh tawh thu an sawi. Sorkar rama cheng an nih thu an sawi bawk.

Nunna chan ta chhungte hi cheng nuai li ṭheuh pek an nih dawn thu district thuneitute chuan an sawi a ni.

Zirtawpni khan ruah a sur nasat avangin Assam hmun hrang hrangah leimin a awm nual a, Khanapara-Jorabat inkar kawng, NH 37-ah pawh lirthei tam tak chu an tangkhang niin report chuan a tarlang.

Jorabat hi Meghalaya leh Assam inrinaa awm a ni a, Meghalaya tlang aṭanga tui luang a tam avangin harsatna an tawk tih an sawi bawk.

Guwahati chhunga hmun tam tak Anil Nagar, Nabin Nagar, Lakhimi Nagar, R.G. Baruah Road, Panjabari Road leh Bhangagarh flyover hnuaia kawng te chu tui tling a tam avangin kal a harsa hle nia sawi a ni bawk a ni.