Meghalaya: South Tura by-poll-ah Conrad Sangma chak

Meghalaya-a South Tura leh Ranikor Constituency-a inthlan ṭhat neiha vote tla zat chu nimin khan chhiar a ni a, Chief Minister Conrad K. Sangma chuan South Tura constituency-ah hnehna a chang.

Hetihlai hian Ranikor con­stiuency inthlan result erawh he thu ziah lai hian hriat hman a ni lo thung a, United Democratic Party candidate Pious Marwein chuan hma a hruai mek nia tarlan a ni.

South Tura bialah hian Natio­nal People's Party (NPP) presi­dent Conrad K Sangma hian vote 8,400 in hnehna a chang niin Chief Electoral Officer (CEO) FR Kharkongor chuan a sawi a, Congress candidate Charlotte W Momin aiin vote 8, 400 in vote a hmu tam zawk a ni.

Heti hian Meghalaya Legis­lative Assembly seat 60 awmnaah chuan Congress leh NPP hian Seat 20 ve ve an la ta a, NPP hi sor­­karna siam lai niin NPP leh a thawh­pui party dang panga te chuan Meghalaya Democratic Alliance (MDA) sorkar an din mek.

NPP president hian vote awm zawng zawng 22,200 aṭangin vote 13,656 a hmu a, a khingpui Congress candidate Charlotte W Momin chuan vote 5,235 a hmu thung niin CEO chuan a sawi.

Ranikor bialah erawh chuan NPP candidate Martin M Danggo lakah UDP candidate Pious Marwein chuan vote 3,390 in he thu ziah lai hian hma a hruai mek thung.

Prime Minister Narendra Modi chuan a twitter-ah Megha­laya Chief Minister Conrad K. Sangma a lawmpui thu hi a tarlang nghal a ni.