Assam-ah face mask hmang lote sum chawi aṭangin Cheng nuai 68 hmuh chhuah a ni tawh

Assam police-te chuan March 25-a lockdown kalpui a nih aṭang khan pawn chhuahnaa face mask hmang lote sum chawitir aṭangin Rs 68,04,400 an hmu chhuak tawh. 

Police-te hian dan bawhchhia mi 4,961 te an man tawh a, mi  3,731 lakah thubuai an ziak lut bawk. Motor 34,655 bakah lawng 23 hren sak an ni bawk a ni. Covid-19 leng chungchanga thu dik lo thehdarh, mi 51-te man an ni a, mi 97 thubuai siamsak an ni bawk. 

Assam-ah hian Ningani khan mi 479 in hri an kai tih hmuh chhuah belh leh a ni a, anni  nen hian hri kai hmuh tawh hi mi 9,434 an awm tawh. An zinga 6,106 chu enkawl dam an ni tawh thung a, enkawl mek hi mi 3,331 an awm. Ningania hri kai hmuh thar zinga 238 chu Guwahati khawpuia mi an ni. Covid-19 vanga thi hi mi 14 an awm tawh bawk. 

Guwahati-a hri kai an pun chak avangin Thawhṭanni aṭang khan ni 14 chhung atan total lockdown puan a ni. Health minister Himanta Biswa Sarma chuan khawpui chhunga hri kai an pun zel avangin private hospital neitute chu kawmin, an hospital ṭheuhah specialised facility leh Covid-19 managment team siam vek turin a ngen. Minister leh private hospital neitute hian hri leng dona kawnga hma lak dan tur te,  health infrastructure tihchangtlun dante an sawiho.