Nagaland BJP-ten sawiselna karah a rukin Vajpayee vap paih

Kohhran hrang hrang leh tribal pawl ṭhenkhatin nasa taka an sawisel hnuah Nagaland Bharatya Janata Party(BJP) chuan Thawhṭanni khan a rukin Prime Minister hlui Atal Bihari Vajpayee vap chu luiah an paih.

BJP-te hian Wokha-a Doyang luiah Vajpayee vap hi an paih dawn tih an puan hnu lawkah khan mi tam takin nasa takin an sawisel nghal a ni,

Nagaland BJP unit chuan sakhaw thil a nih loh thu leh ram thil a nih thu sawi mah se eptu pawl lam leh tribal pawl te chuan vap paih chu Naga culture a nih loh thu leh, an sakhaw kalpui dan nen pawh a inhmeh lo tih an sawi.

Hetiang a nih avang hian Naga­land BJP president Temjen Imna Along Longkumer chuan Dima­pur-a lui lian lo teah a rukin Vajpayee vap hi Thawhṭanni khan a paih ta zawk a, vap paihna hun hi tluang taka neih a nih thu an sawi a ni.

Ruang paihna hun an hman zawh hnu hian Longkumer chuan mipuite chuan thil awmze awm loah buaina tur an sawichhuak mai mai niin a sawi. Sakhaw thil ni lo in Vajpayee chu ram icon anih avangin rampum thil a nih zawk thu sawiin Kristian a nih ang pawhin anni pawh an ṭawngṭai tih a sawi. Puithiam te chuan an tihtur tak erawh an ti nia a hriat thu sawiin anni pawhin dik nia an hriat chu an ti ve mai niin a sawi.

BJP hian Vajpayee vap hi an state luiah an paih dawn tih an sawi hnu lawkah khan Lotha tribe-a pawl pakhat Lotha Hoho chuan nasa takin an sawisel nghal a, luia vap paih chu an hnam culture leh an sakhaw tihdan phung a nih loh thu an sawi nghal a ni.

Nagland Baptist Church Council (NBCC) general secretary Rev. Dr. Zelhou Keyho pawhin an kohhran leh ram pumpui chuan Prime Minister hlui thihna chu an sun thu a sawi. Mahse Kristian tamna state-ah BJP President chuan an rinna hlutna te a dah hniam a, sakhaw dang tihdana a tih chuan thil finthlak tak a ni dawn lo tih sawiin thil hriatthiam harsa tak a ni dawn tih a sawi a ni.