Manipur ralthuam bo case-ah KRA chief man

National Investigation Agency (NIA) chuan Manipur ralthuam bo thubuai an chhuina kal zelah Inrinni liamta khan pistol paruk an hmuchhuak leh tih Thawhṭanni-a report-ah tarlan a ni.

Report chuan Kuki Revo­lutionary Army (KRA) Chair­man David Hangshing chu he thubuai avang hian August 24 khan an man niin a tarlang tel bawk.

Daviv hian pistol bo hi a lo kawl ve a, Saikul constituency MLA, Yamthung Haokip hnen aṭanga a neih nia sawiin Haokip pawh hi a inah pistol bo zinga mi hi hmuhchhuah a nih vangin man a lo ni tawh bawk a ni.

Thu zawhfiah naah David Hanshing hian pistol bo a kawl te chu a dahṭhatna hmun a sawi hnuah 9mm pistol paruk, Imphal aṭanga km 20 vela hlaa awm East Imphal District huamchhungah an hmuchhuak a ni.

Heng pistol bo te hi 2016 leh 2017 vela pistol bo zinga mi a ni ngei tih an serial number aṭangin hmuhchhuah a ni bawk.

Hanshing hi Inrinni khan magistrate hmaah hruai a ni a, police kutah awm mekin NIA Special Court-ah hruai tura tih a ni.

2016 September leh 2017 kumtir inkar velah khan Direc­tor General (DG) Pool Armory, second Manipur Rifles Battalion camp chhung aṭangin 9mm pistol 56 leh magazine 58 lai rukbo a ni tih hriatchhuah a ni a, he thubuai hi NIA kutah dahin NIA chuan an chhuizui a ni.