Sikkim Governor atan Ganga Prasad lalut

Meghalaya Governor hlui Ganga Prasad chu Pathianni khan Sikkim Gover thar tura rinawmna thu tiam tirin lakluh a ni.

Acting Chief Justice Meenakshi Madan Rai chuan Pathianni chawhnuah khan Raj Bhawan-ah rinawmna thu hi tiam tirin Governor thar lakluhna hun hi hman a ni a, he hunah hian Chief Minister Pawan Chamling, Speaker K.N. Rai, Justice Bhaskar Raj Pradhan, ministers, MLA-te bakah sorkar mi pawimawh eng emaw zat an tel.

Rinawmna thu tiam tir a nih hnuah hian Governor hian thuchah a sawi nghal a, state hmasawnna leh ṭhanna tur atan a theihtawp a chhuah dawn thu a sawi.

Ramchhunga state ralmuang ber leh state mawi taka Governor a ni thei chu lawmawm a tih thu a sawi a, Sikkim mipui ten an lo lawmna chu lawmawm a tih thu a sawi bawk. Chief Minister leh a cabinet-te, chief secretary leh sorkar mi pawimawh tak takin an lo hmuak chu thil hlu tak a nih thu sawiin state sorkar leh Sikkim mipui zawng zawng hnenah a lawmthu a sawi a ni.

September 30, 2017-ah khan Ganga Prasad hi President Ram Nath Kovind chuan Meghalaya Governor atan a ruat a, tunah hian Sikkim-ah Governor hi a awm tawh dawn thung a ni.

Inrinni khan Meghalaya leh Tripura Governor thar Tathagata Roy leh Kaptan Singh Solanki-te chu rinawmna thu tiamtir-a lakluh an lo ni tawh bawk.