Nagaland recovery rate-in hma sawn hret

Nagaland-ah Covid-19 hmuh tawh zinga mi 15 chu Ningani khan enkawl dam an ni tawh a, state recovery rate pawhin 0.82% a hma sawnin, 36.83% a ni tawh a ni. 

Hetih lai hian Ningani vek khan hri kai hmuh chhuah thar mi 34 an awm thung a, anni nen hian hri kai hmuh tawh hi mi 535 an awm tawh. An zinga 197 chu an dam tawh a, enkawl mek 338 an la awm. Principal Secretary Home Abhijit Sinha chuan Covid-19 kai mekte hi Covid-19 hospital hrang hrangah enkawl an ni a, an vai hian asymptomatic vek an ni tih a sawi. 

Nagaland-ah hian sample 12,570 test a ni tawh a, heng zinga 8,261 chu Naga Hospital Authority Kohima (NHAK)-a BSL-3 lab-ah test niin; CIHSR, Dimapur-a BSL-2 lab-ah sample 8,133 test a ni tawh bawk. Truenat hmanga sample 6,240 test zingah positive 124 an awm a, hei hi RT-PCRT ah tihchian leh a ni.