Tripura-a PM-in rally a neih avangin Covid hri a darh zual : Left Front

Tripura-a eptu pawl, Communist Party of India-Marxist (CPI-M) kaihhruai Left Front chuan tun thla tir lama prime minister Narendra Modi-a'n Agartala-a mega rally a neih chu an state khawpui Covid hri a darh thar lehna chhan pakhat niin an puh.

Tripura state-ah hian hri kai thar, positivity rate hi 13% niin, state khawpui Agartala bikah positivity rate hi 30% dawn a tling a ni.

Left Front chuan, "Sorkar laipui leh state sorkarte chuan ram pumah Omicron variant lengin harsatna a thlen chhoh dante pawh an hre vek a ni. Hetiang boruak kan tawn mek karah PM hian Tripura buaina tibelhchhah turin public rally pui tham tak a rawn nei a ni," an ti.

January 4 khan PM Modi hian Tripura-a Maharaja Bir Bikram Airport-a terminal building thar a hawng a, hemi hma hian Agartala-ah public rally a nei a, mi tam tak an kalkhawm a ni. He hun hman zawh hian Trinamool Congress chuan sawisel nghalin, PM chuan mi sang telte nunna dinhmun derthawng takah a dahsak a, a rally neih avang hian Tripura chu Covid hri darhna hmun turah a rawn siam a ni, tiin an lo sawisel tawh bawk.

CPI-M Tripura secretary Jitendra Chaudhury chuan PM Modi-a'n rally a neih hnu hian state chhungah Covid hri nasa takin a darh zui tih a sawi.

Pathianni khan Tripura-ah hri kai thar hi 1,070 awm belh lehin mi pathumin an thihpui bawk.

Chief minister Biplab Kumar Deb chuan an state-ah hri kai thar pung zel mah se chhun lamah curfew puan tumna a awm rih lo tih a sawi a, zan lam curfew erawh kalpui chhunzawm zel a ni ang, a ti.

Health portfolio changtu ni bawk, CM Deb chuan state chhunga hri leng dinhmun chu ngun takin a thlithlai reng a ni a, nunphung panngai leh economy dinhmunte a buai phah lohna turin sorkar chuan theihtawp a chhuah zel a ni, tiin a sawi.