AR-in Mon district-a beihpui thlak titawp rih

Assam Rifles-te chuan nikum December thlaa Mon district, Nagaland-a security force-ten civil mi 14 an kahhlum avanga mipuite lungawi lohna avangin, Mon district-a helho laka beihpui an thlak chu an titawp lailawk.

Civil mite thah an nih dan chhui hna zawhfel a nih hma chuan AR hian beihpui thlak hna hi an tawpsan mai thei tih Nagaland sorkar official chuan a sawi.

27 Assam Rifles hi Myanmar ramri bul, Mon district-ah hian an awm a, mahse helho laka beihpui an thlak ṭhinchu chhunzawm rih loin, an camp-ah an awm tawp rih a, ration leh ṭul dang pawimawh tir tur lo chuan an chhuak lo nia sawi a ni. Official-te chuan beihpui thlak titawp rih hi mipuiten an rin ngam leh theihna atan leh, boruak siamṭhatna atan a ngai niin an sawi.

Sipaite kut tuara civil mi eng emaw zat an thih avang hian Nagaland-a sipai thuneihna sang pekna dan hman mek, Armed Forces (Special Powers) Act (AFSPA) hlih phutna chu thar thawh leh a ni a, Naglaand Assembly pawhin AFPSA hlih phutna resolution hi a pass bawk. Hetih mek karah hian December 30 khan sorkar laipui chuan Nagaland-ah AFSPA hi thla ruk dang a pawtsei leh a, hei hian state mipuite lung a tiawi lo hle.