Assam-ah dan loa petition ziahsaktu mi 200 chuang man

Assam chief minister Himanta Biswa Sarma chuan state chhung hmun hrang hrangah Inrinni leh Pathianni khan dik lo taka midangte tana petition ziahsak a, pawisa leh thil dang phuttu mi 242 man an ni tih a sawi.

Chief Minister hian a hmain dik lo taka petition ziahsak ṭhin an awm thu hi a lo sawi lang tawh a, hetiang titu hi dap chhuah zel an ni dawn tih a sawi a ni.

Pathiannia chanchinthar lakhawmtute a kawmnaah, petition ziahsaktute hian complaint-ah a kaihhnawih loh section chungchangte tarlangin, ṭul loah thil buaithlak leh harsa tak angin an lantir a, petition thehluttute rilru pawh an tihbuai sak zawk a ni, a ti.

Police officer pakhat chuan midang tana petition ziahsak hi dan kalh a ni lo a, mahse an ziahsakna mana sum an phut leh, petition thehluttu hnenah engmah sawifiah loa a ṭul lo section an tarlante chu dan kalh a ni thung tih a sawi. 'Heng petition ziahsak ṭhinte hian pawisawilote rilru tihbuai sakin, pawisa te an phut ṭhin a ni," tiin a sawi.

CM Sarma chuan complaint thehlut duhte chu sub-inspector in a lo ziahsak ṭhin tur a ni a, mipuite hian sum an chawi tur a ni lo, a ti.