Assam : Ni thum danah hri kai mek a let zelin pung

Assam-ah Covid-19 hri kai thar an la pun belh zel a, ni thum danah hri kai mek, active case hi a let zelin an pung.

Health department chuan hri leng laka invenna tur kaihhruaina dante zawm ṭhat a nih tawk loh avangin hri kai thar hi an pung chak nia a lan thu a sawi. Hetih lai hian sorkar chuan hri kaite hi an dinhmun a ngaihtuahawm lo a nih chuan in lama inenkawl tura a tih avangin a tam zawk chu home isolation in an awm a ni.

National Health Mission (NHM), Assam-in a talran danin January 15 zanlai thleng khan active case hi 17,777 an awm a, January 11-a 9,253 awm aiin a let dawnin an pung hman a ni. Active case zinga hmun lia ṭhena hmun khat hi Kamrup (Metro) district, state khawpui Guwahati awmna hmuna mite an ni.

Pathianni khan Guwahati khawpuia hri kai hmuh thar, positivity rate hi 16.96% ah a kai chho tawh bawk.

Chief minister Himanta Biswa Sarma chuan hri kai pung zel mah se lockdown puan a la ngai lo tih a sawi a, hemi rual hian hri laka invenna tur kaihhruaina siamte chu khauh taka kengkawh turin thuneitute a hriattir. Assam-ah hian Pathianni aṭang khan Covid vaccine dose kima la lote chu vantlang hmun hrang hrang, hotel, court, bazar-ahte an kal phalsak an ni lo. Heng hmuna kalte hian Covid vaccine an lakna certificate an entir zel a ngai a ni.