AP: Siang-a village headman 53 in banna an thehlut

Arunachal Pra­desh-a Siang district-a Pangin leh Kebang biala gaonburas (village headman) 53-te chuan Thawhlehni khan Siang deputy commissioner office-ah banna lehkha an thehlut.

Gaonburas-te hian sorkarin Siang district headquarters, Pangin (Perang-Lampang) aṭanga Boleng-a sawn an duh loh vangin banna hi an thehlut a ni.

Banna lehkha an thehluhah hian headman te hian state cabinet-in March 12-a thutlukna an siam, district headquarter Boleng-a sawn tura an tih chu an duh loh thu an ziak a, District Reorganisation Act amendment bill, fur session-a ngaihtuah tura ruahmanna an siam pawh chu an duh loh thu an ziak.

Headman-te hian state sorkar thutlukna chu mumal lo, dan kalh leh politics thil vang niin an puh.

Pangin headman, Tameng Messar (87) chuan district thar Siang headquarter lungphum chu Pangin-ah phum a nih thu a sawi a, Congress sorkar hunlaia Chief Minister Nabam Tuki chuan lungphum chu a phum thu sawiin, BJP sorkar chuan tihluihnain Boleng-ah sawn an tum tih a sawi. Sorkar hmasa hmalakna chu an thlak danglam thu sawiin an thiltih dan chu a demawm a tih thu a sawi.

Headman ṭhenkhat chuan Pangin-ah chuan mipui ten headquarter building thar dinna tur ram pawh an pe tawh niin an sawi bawk.

Pangin-ah hian sorkar thutlukna duh lohna lantir nan hian darkar 72 bandh huaihawt a ni a, nimin khan sorkarin an thutlukna an sawhsawn a nih loh chuan an bandh huaihawt hi tiam chin nei loa chhunzawm an tum a ni.