AP Assembly-ah district thar pathum siamna tur pharh
Arunachal Pradesh Deputy Chief Minister Chowna Mein chuan Thawhlehni khan state assembly-ah Arunachal Pradesh Re-Organisation of Districts (Amendment) Bill 2018, district thar pathum siam belhna tur bill a pharh.
He bill-ah hian Pakke-Kessang, Lepa Rada leh Shi Yomi district te siam belh tura ruahman a ni.
Arunachal Pradesh-ah hian district 22 a awm mek a, district thar pathum siam rawtna bill hi pawm a nih chuan district 25 an nei dawn a ni.
Pakke-Kessang district hi East Kameng district aṭanga lakchhuah tura ruahman a ni a, administrative unit panga Pakke-Kessangn, Seijosa, Pijiriang, Passa Valley leh Dissingn Passo siam tum niin Lemmi-ah district headquarter dah tum a ni thung.
Lepa Rada district erawh chu Lower Siang district aṭanga siam tum a ni a, Basar-ah headquarter dah tum a ni thung. Administrative unit pali- Tirbin, Basar, Daring leh Sago-te dah tum a ni bawk.
Shi-Yomi district hi West Siang district aṭanga saim tum a ni a, Tato-ah district headquarter dah a ni thung ang. Administrative unit pali- Mechuka, Tato, Pidi leh Manigong-te dah tum a ni thung a ni.