Assam CM : Vaccine la duh lo chu inah tawm mai rawh se

Assam chief minister Himanta Biswa Sarma chuan Covid-19 vaccine la duh lote chu pawn chhuak loin inah tawm mai rawh se, tiin Guwahati-a press conference a neihah a sawi.

Assam sorkar hian vaccine la thei chin chu la vek tur hian a ngen a, hemi rual hian innawr luihna a awm lo, mahse a la duh lote chu vantlang punkhawmna hmun te, mall, office leh restaurant-te bakah meeting-ah pawh an tel a remti lo a ni. Vaccine la lote chu hospital-ah chauh an kal phalsak a ni.

CM Sarma chuan,"Vaccine la duh lo chu inah an awm mai a ngai ang. A ṭul a nih chuan state chhungah Covid-19 vaccination certificate chu entir zel tur pawhin kan ti dawn a ni. Mipuite tana thil ṭha lo thlenna tur thil a awm kan remti lo," a ti.

Sorkar hnathawk, Covid vaccine la lo chu Thawhṭanni aṭang khan office kal phal a ni lo bawk a, casual leave lak tir an ni. Sorkar chuan hnathawk, vaccine la lote hi an leave a zawh hnuah pawh unpaid leave-in a chawlh tir zel dawn a ni.

State chhungah hian vaccine la thei chin, kum 18 chung lam zingah vaccine dose kima la lo mi nuai 50 dawn an la awm.

Assam-ah hian Thawhṭanni khan hri kai thar 6,982 awmin, hripui len hnua ni khata hri hmuh chhuah tam ber ni a ni. Hri hmuh thar zingah hian Omicron variant kai 47 an tel. Sample 64,919 test niin, positivity rate hi 10.75% a ni. Hemi ni vek hian Covid hri vangin mi 11 an thi bawk. State sorkar report-a a lan danin, Assam-ah hian Bihu festival hman hma, kar liam ta Ningani khan positivity rate hi 7.87% niin, January 1 khan 0.77% a ni. Kar hnih liam ta chhungin hri kai thar hi 25,000 chuang an awm hman.

Omicron kai hi Assam-ah 56 an awm tawh a, he hri kai hmuh thar zinga 21 chu ram pawn-a zin chhuak an ni a, a tam zawk erawh chu zin chhuahna nei lo an ni thung. State health department chuan a bikin Jorhat district-ah, hmun danga kalchhuahna nei lo zingah Omicron kai eng emaw zat hmuh chhuah a ni a, hei vang hian tualchhungah a darh tawh nia a lan thu a sawi.