Meghalaya-in naupang pualin special development mission siam dawn

Meghalaya sorkar chuan Integrated Child Development Services (ICDS) programme in a huam loh, thingtlang khaw 1,500 chuanga naupangte pulain Early Childhood Development Mission (ECDM) a kalpui dawn.

Education minister Lakhmen Rymbui chuan Thawhṭannia cabinet meeting zawha chanchinthar lakhawmtute a kawmnaah, ECDM hi cabinet-in a pawm tih a sawi. He mission hi social welfare, health and family leh education department-te huam chhungah kalpuiin, naupangten hriselna ṭha leh zirna ṭha zawk an neih theihna turin hma a la dawn a ni, tiin minister chuan a sawi.

Meghalaya-ah hian naupang kum 6 hnuai lam nuai li chuang an awm thu minister chuan a sawi bawk. ICDS programme hian thingtlang khaw 4,000 chuang vel chauh a huam a, a huam tel loh khaw 1,500 chuanga naupangte tan he ruahmanna hi state sorkar chuan a siam a ni.

State chhunga naupang zawng zawngten hma an sawn theihna turin sorkar chuan hma a la zel dawn tih Rymbui chuan a sawi a, mission an kalpuina tura sum mamawh zat chu fund petu agency nen inremna an ziahfel hunah tihfel a ni ang, a ti.

Sorkar hna luh theih chin kum tihsan chungchang ngaihtuah
Meghalaya cabinet chuan Thawhṭanni vek khan sorkar hnaa luh theih kum bitliah tihsan chungchang a ngaihtuah a, mahse thutlukna siam loin meeting neih leha ngaihtuah chhunzawm turin a dah.

State sorkar chuan sorkar hnaa luh theih kum bithliah, kum 32 chin chu kum nga belh a, kum 37 chinah dah a tum a ni.

Kum bithliah tihsan hi political party, pressure group leh mipuiten hun rei tak an lo nawr tawh a ni. UPD president Lyngdoh chuan kum bithliah chin tihsan chuan ṭhalai tan pawh sorkar hnaa luh theihna kawng tam zawk a inhawng thei dawn tih a sawi a, state tam tak chuan upper age limit kum 38 leh kum 40 thlengte pawh an ti a ni, a ti.