China in tui a sah vangin AP leh Assam inralring turin hriattir

China chuan Ningani khan Tsangpo lui-a tui 9020 cumec a sah avangin Siang/ Brahmaputra lui bula awm Arunachal Pra­desh leh Assam-a hmun hniam lama awm te chu inralring tura hriattir an ni.

Central Water Co­mmission (CWC) chuan Arunachal Pradesh-a Siang lui chu sang tak takin a fawn niin an tarlang.

East Siang District thuneitute chuan mipuite chu fimkhur tura chahin sangha man tur te, tui cheng tur leh lui bulhnaia pungkhawm lo turin an hriattir.

T Tatak, deputy commi­ssioner, East Siang District, Pasighat, Arunachal Pradesh chuan Chinese sorkar chuan Arunachal sorkar hnenah China-ah ruah a sur nasat avangin Tsangpo luiah Ningani zing dar 8 velah khan tui 9020 cumec an sah tih an hriattir tih a sawi a, hei hi kum 50 chhunga tui an sah tam ber ṭum a nih thu a sawi bawk.

Tatak chuan an state chhung hmun hniam laia cheng, a bikin Jarku, Paglek, SS Mission, Jar­kong, Banskota, Bergung, Sigar, Borguli, Seram, Kongkul, Namsing leh Mer-a cheng te chu fimkhur turin a chah.

Assam State Disaster Ma­nagement Authority, Dibrugarh District thuneitute pawhin fimkhur a ṭul thu an sawi ve nghal bawk.

Deputy Commissioner Loya Maduri chuan ukuk taka thil awmdan an zirchian reng thu a sawi. Chabua revenue circle chhunga tuilen hlauhawmna laiah thil awmdan thlithlai turin team an tir tih a sawi a, a ṭul a nih phawt chuang henglaia mite chu an sawnchhuak dawn niin a sawi bawk. Maduri chuan lawng pawh an inrin reng thu sawiin Circle Officer, Zonal Officer, Sector officer leh officer dangte pawh uluk taka thil awmdan enfiah turin an hriattir thu a sawi.

Hetihlai hian report in a tarlan dan chuan Pasighat leh a chhehvelah chiah tui hi a fawn nasa a, Assam lamah chuan hlauhawm lutuk rih lo nia hriat a ni.